Халкъара савгъатгъа ес болгъан

30 October 2019
Самадовну диплому
Самадовну диплому

Гьар халкъны, районну, жамиятны атын абурлу ва белгили этеген адамлар бола. Олар гьар бир тармакъда гёрмекли оьрлюклеге ва уьстюнлюклеге етише ва оьзюню халкъыны атын да оьр эте. Шолай адамлар гиччи элибизни ва халкъыбызны гьар бир ерде оьзюбюзню оьктем тутмагъа борчлу эте.

Шолай адамлар жамият чалышывда, билим беривде, савлукъ сакълавда, маданият, адабият, спорт, юрт хозяйство тармакъларда, Ватанын сюювде ва якълавда ва кёп-кёп оьзге ишлерде уьлгю гёрсете ва оьзлени атлары булан оьсюп гелеген наслуланы тарбияламагъа ёл гёрсете.

Багьавутдин Самадов артдагъы 10 йылны ичинде оьзюню яшав ва яратывчулукъ ёлларында гёрмекли ва уьлгюлю оьрлюклеге етишмеге бажаргъан. Ол 2009-нчу йылда "Районну яшаву" газетге хас мухбир болуп ишге чакъырылды. Арадан оьтген вакътини боюнда Багьавутдин Самадов оьз касбусун мекенли ва тийишли кюйде юрютеген журналистден башгъа да, халкъыбызны арасында белгили шаир гьисапда да аян болду. 2014-нчю йынлы башындан берли ол "Районну яшаву" газетни баш редакторуну орунбасарыны къуллугъунда чалыша.

Масала, Багьавутдин Самадов Къарабудагъгент район администрацияны, ДР-ни милли сиясат ва дин масъалалагъа, олай да билим берив, маълумат ва печат министерликлени гьюрметлев грамоталары булан савгъатлангъан. Олай да. огъар ДР-ни ва РФ-ни журналистлерини союзларыны, ДР-ни Башчысыны гранты, ДР-ни Муфтиятыны, РФ-ни информатизация, байлавлукъ ва масса коммуникация министерлигини гьюрметлев грамоталары да тапшурулгъан. 

Сонг да Багьавутдин Самадов 2015-нчи йылда Къазанда ва 2017-нчи йылда Тюркистанда (Къазахстан) оьтгерилген тюрк миллетлени шаирлерини фестивалларында ва гьакълашывларында оьзюню ортакъчылыгъын болдургъан ва дипломларына ес болгъан.

Багьавутдин янгыз журналист тюгюл, ол шиърулар да яза. Ол – эки китапны автору да дюр. "Умут" ва "Алгъа абат" деген китапларында автор яшавну тармакъларындагъы кёа аслу темаланы гётере, бизин гьар-бир ишге къуршалмагъа ва ойлашмагъа чакъыра. Багьавутдин Самадовну бир нече шиърусу азербайжан, балкъар, башкъырт тиллеге гёчюрюлген, Къазанда, Уфада, Анкарада чыгъарылагъан газетлерде ва журналларда басмадан чыгъарылгъан. Демек, Багьавутдин Самадовну тюрк дюньясында да таный деп айтмагъа болабыз.

Муна, алдагъы гюнлерде Багьавутдин Самадовгъа бирдагъы бир сююнч хабар гелди. Айтагъаным, ол журналистлени арасында оьтгерилген Халкъара конкурсда ортакъчылыкъ этген ва шону барышында алдынлы ерге ес болмагъа бажаргъан.

Ачыкъ этип айтсакъ, 26-нчы октябрде Башкъырт уьлкени тахшагьары Уфада журналистлени арасында оьтгерилген "Алтын курай" деген Халкъара конкурсну гьасиллери чыгъарылды ва шогъар багъышланып уллу чара оьтгерилди. Шо конкурсгъа Китай, Канада, Тюркия, Азербайжан, Чехия тыш уьлкелер булан янаша РФ-ни Башкъыртстан, Татарстан, Алтай, Хакасия, Саха (Якутия), Къарачай-Балкъар республикаларындан, Свердловск, Челябинск, Брянск областларындан ва Москвадан журналистлер оьзлени макъалалрын йиберген эди. 

Халкъара конкурсну жюрисине Россияны журналистлерини Союзуну председатели Владимир Соловьев ёлбашчылыкъ этди. Конкурсну жюриси чыгъаргъан гьасиллеге гёре, 100-ден де артыкъ журналист оьзлени материалларын йиберген. Аслу гьалда конкурсгъа журналистлерден очерклер, макъалалар, теле ва радиоберилишлер, интернет материаллар йиберилген.

"Алтын курай" деген конкурс Башкъырт республиканы Гьукуматыны, Россияны ва Башкъыртны журналистлерини союзларыны, белгили башкъырт шаир Мустай Каримни атындагъы фондуну ва "Уфа" журналны редакциясыны сиптечилиги булан оьтгерилди. Белгили кюйде, 2019-нчу йылда Башкъырт республиканы ва башкъырт шаир Мустай Каримни 100 йыллыкъ юбилейи оьтгериле. Шогъар багъышланып, Россияда ва Башкъытрда кёп санавда чаралар белгилене. "Алтын курай" деген конкурс ва чараланы тамамлай ва гьасилин чыгъара деп айтмагъа ярай.

Шоллукъда, 7 тюрлю номинацияда алдынлылар белгили болду. Бизин Багьавутдин Самадов "Мен орус тюгюлмен, тек россиялыман" деген гюпде 3-нчю ерни къазанмагъа, лауреат ат алмагъа ва дипломгъа ес болмагъа бажарды. "Дослукъ учун не дазу, не мезгил ёкъ" деген ону макъаласы "Районну яшаву" газетни 2019-нчу йылдагъы 1-нчи номеринде печат этилген эди. Оьзге макъалалар йимик, шо макъала да газетни хас сайтына салынгъан. Шонда янгыз 1 айны ичинде 300-ден артыкъ адам шогъар къарагъан деген санав бар эди. Гьали буссагьат 425 адам шо макъалагъа къарагъан. Айтагъаным, Багьавутдинни макъаласы халкъыбызны тергевюн оьзюгер бакъдыргъан.

"Дослукъ учун не дазу, не мезгил ёкъ" деген макъаласында Багьавутдин Самадов оьзю дос ва къурдаш болгъан башкъырт халкъны абурлу ва белгили адамлары гьакъда хабарлай, къумукъ ва башкъырт миллетлени арасындагъы дослукъну беклешдирмеге ва генглешдирмеге чакъыра.

26-нчы октябрде Уфада Мустай Каримни атындагъы Яш милли театрны бинасында оьтгерилген байрам чараны барышында РФ-ни журналистлерини Союзуну председатели Владимир Соловьев оьзюню къолу булан Багьавутдин Самадовгъа алдынлыкъны алгъан дипломну тапшургъан, огъар ва ону къаламдашларына гележекде дагъы да уьстюнлюклер ёрагъан.

Олай да, шатлыкъда Мустай Каримни къызы, ону атындагъы фондну ёлбашчысы Алфия Каримова, Башкъырт уьлкени гьакимлери, белгили шаирлери, алимлери ортакъчылыкъ этген ва алдынлыланы къазангъан журналистлеге оьрлюклер ёрагъан.

Чарада сёйлеген журналист ва шаир Багьавутдин Самадов, конкурсну онгаргъанлагъа ва гьюрметли жюриге гьакъ юрекден баракалласын билдире туруп, къумукъ ва башкъырт халкъланы аралыкъларын беклешдирмек ва яхшылашдырмакъ учун энниден сонг да оьзюнден болагъанын этежегин ташдыргъан.

Къаламдашыбыз, шаир ва журналист Багьавутдин Самадовгъа дагъы да оьрлюклеге етишмекни ёрайбыз.

Къапкъазов Къазанбий Къазаналпович

Уважаемые подписчики и гости нашей страницы!

Предлагаем для чтения другие интересные разделы:

История

Кумыкская аналитика

МУЗЕИ

Краеведение

Краеведческие походы в 2016 году:
Краеведческие походы 2017 году:
Краеведческие походы в 2018 году:
Краеведческие походы в 2019 году:
Краеведческие походы в 2020 году:

Религиозная тема, репрессии и насильственное переселение

Военная тематика

Къумукъ тилде макъалалар

На турецком

ВИДЕО ССЫЛКИ ( Наш архив )

Дорогие читатели, мы ценим Ваши комментарии и пожелания!

МЫ В СОЦСЕТЯХ

Официальный сайт

подпишись