Гаилә коруның файдасы ачыкланган

22.06.2018

Гаилә корып, бергә яшәүче кешеләрдә йөрәк-кан тамырлары авырулары, инсульт, иртә үлем хәвефенең кимүе ачыкланган. Бөек Британиядәге Килск университеты галимнәре шундый фикергә килгән.

Белгечләр 1963-2015 еллардагы гаилә һәм сәламәтлек арасындагы бәйләнешкә багышланган тикшеренүләрне анализлаган. Анда 42-77 яшьлек ике миллионга якын кеше катнашкан.

Бер тапкыр да никахка кермәгән, аерылган, тол калган кешеләрнең йөрәк авыруларыннан һәм инсульттан ешрак үлүе ачыкланган. Аерылышу йөрәк авырулары хәвефен – 25, инсультныкын 16 процентка күтәргән.

Бу хәлне гаиләдә яшәүче кешеләрнең сәламәтлегендәге проблемаларны иртәрәк күрүе, табибка вакытында мөрәҗәгать итүе, даруларны даими куллануы, ныграк тәэмин ителгән һәм ныклы социаль бәйләнешләрдә булуы белән аңлаталар.