Гөмбә җиләк түгел, аны чиләккә җыймагыз!

13.07.2018

Гөмбә сезоны ачылу белән халык урманга ашыга.

Кызганычка каршы, ел саен гөмбә ашап агуланган кешеләрнең саны арта, шуңа да "Роспотребнадзор" сайтында бу уңайдан киңәшләр басылган.

Ведомство хәбәр итүенчә, гөмбәдән агулануны сәламәтлекләре какшаган кешеләр һәм балалар авыр кичерә. Бала организмында бу ризыкны үзләштерерлек кирәкле күләмдә ферментлар юк. Шуңа да 14 яшькә кадәр булган балаларга гөмбә ашатырга ярамый.

Гөмбә белән агуланмас өчен аларны юлдан мөмкин кадәр ераграк, завод-фабрикалар якын булмаган, экологик чиста урыннардан җыярга кирәк. Аларны чиләккә яисә пакетка салырга ярамый, бары тик үрелгән кәрзингә җыярга кирәк. Өйгә кайткач, көнендә эшкәртеп кую да бик мөһим.

Фото: pixabay.com сайтыннан